Mae Swyddfa Comisiynydd y Gymraeg wedi lansio canllawiau i fusnesau ac elusennau eu defnyddio er mwyn hwyluso defnydd o’r Gymraeg ar arwyddion.
Mae Swyddfa’r Comisiynydd yn gweld hyn fel rhan o’u gwaith yn hwyluso cyngor i unigolion sydd efallai angen cymorth neu gyfarwyddyd ynghylch sut i ddefnyddio’r Gymraeg yn eu gweithleoedd tu hwnt i’r sector gyhoeddus. Mae hefyd yn chwarae rhan yn awydd y Comisiynydd Iaith, Efa Gruffydd Jones, i ddarparu cyngor ymarferol ac eglur i unigolion, fusnesau a sefydliadau bydd yn helpu i hyrwyddo defnydd pellach o’r Gymraeg yn yr hir dymor.
Mae’r canllawiau diweddaraf hyn yn rhan o gyfres o adnoddau mae swyddfa’r Comisiynydd yn eu darparu i fusnesau a sefydliadau sydd eisiau cynyddu defnydd o Gymraeg. Ymhlith yr adnoddau sydd ar gael mae canllawiau ar sut i ddefnyddio’r Gymraeg ar y cyfryngau cymdeithasol, sut i ddylunio yn ddwyieithog, sut i ystyried y Gymraeg wrth recriwtio ymhlith nifer o adnoddau eraill sy’n trafod sut mae mynd ati i ddefnyddio’r Gymraeg mewn ffordd hwylus yn eich sefydliad.
Gall unrhyw un sydd â diddordeb mewn cynyddu gwelededd y Gymraeg yn eu busnes neu sefydliad ganfod y canllawiau, ynghyd a gwybodaeth bellach ynghylch manteision defnyddio’r Gymraeg yn eich busnes, drwy ddilyn y ddolen hon.
